Washington/New Delhi: America ne Iran se petroleum utpadon ke vyapar ke aarop me do Mumbai sthit companies aur paanch Bhartiya nagrikon par pratibandh laga diye hain. US Department of State ne Gurvaar ko ghoshna ki ki SSPL Solutions Private Limited aur Samudra Marine Services Private Limited ne Iran se petroleum utpadon ke aayat me madad ki aur Tehran ko laakhon dollar pahunchaye.
Ye karyavahi America ke ‘Operation Economic Outcast’ ke tahat Iran ke khilaf chal rahe vyaapak crackdown ka hissa hai. Kul milakar 10 sansthaon, 6 vyaktiyon aur 5 jahazon par pratibandh lagaye gaye hain, jo Bharat, UAE, Turkiye, Iran aur UK me faile network se jude hain.
Kin par laga pratibandh?
Darasal, SSPL Solutions se jude Dhwani Vora aur Nisarg Vora, tatha Samudra Marine Services se jude Ketan Kochikar, Bhupendrasingh Sahu aur Harishyam Hariharan Chundakattil par pratibandh lagaya gaya hai. US State Department ke anusaar, SSPL ne February se July 2025 ke beech lagbhag 2 million dollar ke Irani petrochemical utpadon ka aayat kiya, jabki Samudra Marine Services — ek customs brokerage firm — ne in aayaton me madad ki.
Pratibandh ke baad ye companies aur vyakti in farmon se jude koi lenden nahi kar sakenge. US ka kehna hai ki ye kadam Iran ke tel rajaswa ko kaatne ke liye uthaya gaya hai, jo uske “najaayaz aacharan” ko badhava deta hai.
Bharat par kya asar?
Bataya ja raha hai ki dono companies private aur unlisted hain — ve NSE ya BSE par listed nahi hain, isliye iska share bazaar par seedha asar nahi padega. Lekin vyaapak tasveer chintajanak ho sakti hai. US ne chetavni di hai ki jo bhi vittiya sanstha ya company in pratibandhit sansthaon ke saath vyapar jaari rakhegi, use bhi US vittiya pranali se bahar kiye jaane ya pratibandhon ka saamna karna pad sakta hai.
Gaurtalab hai ki ye kadam us samay aaya hai jab Bharat aur America ke beech vyapar samjhaute par baatcheet chal rahi hai aur Russia se tel khareed par bhi tanaav bana hua hai. Trump prashasan Iran ke tel rajaswa ko poori tarah sukhana chahta hai. Vishleshakon ke anusaar, Bhartiya maritime aur logistics sector ko ab compliance jokhimon par nazar rakhni hogi, kyunki secondary sanctions ka khatra bana hua hai.
Isse pehle bhi America ne Iran ke “shadow fleet” se jude Bhartiya shipping companies par pratibandh lagaye the. Naye pratibandh is baat ka sanket hain ki Washington is network ko jad se ukhadne ke liye gambhir hai — aur is daud me Bharat ki oor se bhi kadi nazar ki zaroorat hogi.
Gaurtalab hai ki ye karyavahi keval do companies tak seemit nahi hai. US State Department ne kul 10 sansthaon, 6 vyaktiyon aur 5 jahazon par pratibandh lagaye hain, jo Bharat, UAE, Turkiye, Iran aur UK me faile network ka hissa hain. Turkiye ki Noorzad Petrokimya aur UAE ki ArabianPro Materials FZCO jaisi companies bhi nishane par hain. Washington ka sandesh saaf hai — Iran ke tel network se jude koi bhi vyakti ya sanstha surakshit nahi hai.
Vishleshakon ke anusaar, Bharat ke liye ye dohra sanket hai. Ek taraf urja suraksha ke liye saste tel ke srot zaroori hain, doosri taraf America ke saath vyapar aur ranneetik sambandhon ko khatre me nahi dala ja sakta. Aane wale hafton me dekha jayega ki New Delhi is santulan ko kaise sadhti hai.
